चतुर्थश्रेणी कर्मचाऱ्यांसाठी विशेष अभ्यासकेंद्राचे उदघाटन

आता राबणारे हातही गिरविणार ‘मुक्त’ शिक्षणाचे धडे

जि. प. अध्यक्षा शीतल सांगळे यांच्या हस्ते उदबोधन सत्राचे उदघाटन

नाशिक : समाजातील वंचित आणि दुर्लक्षित घटकांना शिक्षणाच्या प्रवाहात आणून त्यांना शिक्षित करण्याचे काम मुक्त विद्यापीठ गेल्या २८ वर्षांपासून यशस्वीपणे करीत आहे. समाजाला शिक्षित करतानाच विद्यापीठ परिसरात निरनिराळ्या ठिकाणी वर्षानुवर्षे राबणाऱ्या चतुर्थश्रेणी कर्मचाऱ्यांनासुद्धा शिक्षणाच्या प्रवाहात आणून, त्यांच्या कुटुंबाचा शैक्षणिक आणि आर्थिक विकास साधण्यासाठी घेतलेला पुढाकार नवी नांदी आहे. एरवी ऊन, वारा, पाऊस अंगावर झेलून राबणारे हात आता शिक्षणाचे धडे गिरविणार असल्याने कर्मचाऱ्यांच्या जीवनात प्रकाशाची किरणे पडतील असे प्रतिपादन नाशिक जिल्हा परिषदेच्या अध्यक्ष शीतल सांगळे यांनी केले.

यशवंतराव चव्हाण महाराष्ट्र मुक्त विद्यापीठाच्या वतीने विद्यापीठातील दैनंदिन वेतनावरील चतुर्थश्रेणी कर्मचाऱ्यांसाठी कुलगुरू प्रा. ई. वायुनंदन यांच्या पुढाकारातून सावित्रीबाई फुले अभ्यासकेंद्राचे उदघाटन बुधवारी करण्यात आले. यावेळी त्या बोलत होत्या. यावेळी अभ्यासकेंद्राचे उदघाटन एसएनडीटी विद्यापीठाच्या माजी कुलगुरु डॉ. रूपा शहा यांच्या हस्ते करण्यात आले तर अभ्यासकेंद्राच्या उदबोधन सत्राचे उदघाटन जिल्हा परिषदेच्या अध्यक्ष शीतल सांगळे यांच्या हस्ते करण्यात आले. याप्रसंगी डॉ. हांडे, कुलसचिव डॉ. दिनेश भोंडे, विद्यार्थी सेवा विभागाचे संचालक डॉ. प्रकाश अतकरे व्यासपीठावर उपस्थित होते. कार्यक्रमाच्या अध्यक्षस्थानी कुलगुरू प्रा. ई. वायुनंदन हे होते.

शीतल सांगळे यांनी यावेळी महिला कर्मचाऱ्यांशी आपुलकीने संवाद साधला. तुम्हाला कशाची आवड आहे, सुटीत काय करायला आवडते, अभ्यासा व्यतिरिक्त इतर पुस्तके वाचायला आवडतील का, संगणक शिकायला चालेल का अशा प्रकारे हितगुज केले. विद्यापीठाच्या निसर्गरम्य वातावरणात काम करता करताच शिक्षण घेण्याच्या मिळालेली संधीचे सोने करून दाखवावे असेही त्या म्हणाल्या.

कृषीविज्ञान केंद्राचे कार्य कौतुकास्पद 

यावेळी त्यांनी विद्यापीठाच्या कृषी विज्ञान केंद्राच्या प्रक्षेत्राशी भेट दिली.अत्याधुनिक शेती करतानाच क्षेत्रानुसार नवीन पिक पद्धतीचे तंत्र अवगत करून देण्यासाठी मुक्त विद्यापीठाच्या कृषीविज्ञान केंद्राचे कार्य कौतुकास्पद आहे. या केंद्रामुळे विशेषतः जिल्ह्यातील आदिवासी शेतकऱ्यांना एकात्मिक शेतीविषयक मार्गदर्शन मिळाल्याने त्यांचे जीवनमान उंचावत आहे, असे गौरोदगारही त्यांनी प्रक्षेत्रास भेट दिल्यानंतर काढले. विशेषतः ग्रामीण, आदिवासी, डोंगराळ आणि अतिदुर्गम भागातील महिला व युवकांना शिक्षणाबरोबरच रोजगार आणि स्वयंरोजगाराच्या संधी निर्माण करून देण्यासाठी या विद्यापीठाच्या कृषी विज्ञान केंद्राद्वारे होत असलेले प्रयत्न वाखाणण्याजोगे असल्याचे त्या म्हणाल्या.

यावेळी डॉ. रूपा शहा म्हणाल्या, शैक्षणिक क्षेत्रात काम करताना खऱ्या अर्थाने तळागाळातील समाजाच्या विकास कसा करायचा हे कुलगुरू वायुनंदन यांनी आपल्या कृतीतून प्रत्यक्ष दाखवून दिले आहे. यातून महिलांचे सबलीकरण होण्यास निश्चितच हातभार लागेल असेही त्यांनी स्पष्ट केले.

यावेळी प्रवेशित पूर्वतयारी शिक्षणक्रमाच्या कर्मचाऱ्यांना जिल्हा परिषदेच्या अध्यक्ष शीतल सांगळे यांच्या हस्ते पुस्तकांचे वाटप करण्यात आले. कार्यक्रमाचे प्रास्ताविक डॉ. प्रकाश अतकरे यांनी केले. अनुराधा भोसले यांनी सूत्रसंचालन केले. प्राजक्ता देशमुख यांनी पाहुण्यांचा परिचय करून दिला. प्रभारी जनसंपर्क प्रमुख संतोष साबळे यांनी आभार मानले.

Share this with your friends and family

You May Also Like

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

error: तूर्तास तुम्ही हा मजकूर कॉपी करू शकत नाही. क्षमस्व.