रोजच्या धावपळीच्या जगण्यामुळे प्रत्येकाच्या जीवनशैलीत मोठे बदल झाले आहेत. या बदलांमुळे मधुमेह आणि वजनामध्ये मोठी वाढ या दोन आरोग्यविषयक तक्रारी निर्माण झाल्या आहेत. नेमक्या याच समस्यांवर मार्गदर्शन करण्यासाठी लोकमान्य मल्टीपर्पज को-ऑप सोसायटी लिमिटेडकडून सुप्रसिद्ध आहार तज्ज्ञ डॉ.जगन्नाथ दीक्षित यांच्या व्याख्यानाचे आयोजन करण्यात आले आहे. यावेळी जीवनशैली बदलातून स्थूलत्व व मधुमेह मुक्ती याविषयावर ते मार्गदर्शन करणार आहेत. दिनांक १६ फेब्रुवारी २०२३ रोजी सायंकाळी ५ वाजता रावसाहेब थोरात सभागृह, गंगापूर रोड, नाशिक येथे व्याख्यान संपन्न होणार आहे. सदरचे व्याख्यान सर्वासाठी खुले आणि मोफत स्वरूपाचे आहे. dr Jagannath Dixit
लोकमान्य मल्टीपर्पज को-ऑप सोसायटी लिमिटेडकडून नेहमीच विविध सामाजिक उपक्रम राबविले जातात. हीच परंपरा कायम ठेवत नागरिकाच्या आरोग्य संवर्धन आणि त्यासाठी योग्य मार्गदर्शन या हेतूने डॉ. दीक्षित यांच्या व्याख्यानाचे आयोजन करण्यात आले आहे. मधुमेह विकार होणे आता सामान्य गोष्ट झाली आहे. अनेकजण याकडे पुरेसे लक्ष देत नाही. यातूनच पुढे आरोग्याच्या अनेक समस्या निर्माण होतात. सोबतच वजन कमी करण्यासाठी ऐकीव गोष्टींचा अवलंब केला जातो. हे सर्व रोखण्यासाठी ‘दीक्षित जीवनशैली‘ अर्थात ‘दीक्षित पॅटर्न’ चा अवलंब केल्यानंतर अनेकांना त्याचा लाभ झाला आहे. हीच या जीवनशैली लोकांपर्यंत पोहोचवणारे डॉ. दीक्षित स्व:ता मार्गदर्शन करणार आहेत. डॉ. दीक्षित यांनी स्थापन केलेल्या असोसिएशन फॉर डायबेटिस आणि ओबेसिटी रिव्हरसल अर्थात अडोर ट्रस्टतर्फे भारतात १४ शहरात मधुमेह मुक्ती केंद्रे सुरु असून यातून हजारो रुग्णांना सेवा दिली जात आहे. दीक्षित यांचे हे कार्य बघूनच नाशिककरांनाही याचा लाभ व्हावा या उद्देशाने सदरचे व्याख्यान संपन्न होत असल्याचे आयोजकांनी सांगितले आहे. तरी या व्याख्यानाचा लाभ नाशिककरांनी घ्यावा असे आवाहन लोकमान्यकडून करण्यात आले आहे.
नाशिकमध्ये गेल्या ९ वर्षांपासून लोकमान्य सोसायटी कार्यरत आहेत. लोकमान्यकडून वेगेवगळ्या सुरक्षित ठेव योजना, विमा, बचत खाते, म्युच्युअल फंडमधील गुंतवणूक,विविध प्रकारचे कर्ज आदी सेवा दिल्या जातात. शहरातील नवीन सिडको, सावरकरनगर, इंदिरानगर, नाशिकरोड आणि जळगाव येथे शाखा आहेत. सोबतच विभागीय कार्यालय देखील आहे. आणि त्याच इमारतीमध्ये मेरीगोल्ड हा बँक्वेट हॉल असून यामार्फत नाशिककरांना सेवा दिली जाते.
डॉ जगन्नाथ दीक्षित यांचा परिचय
डॉ जे व्ही दीक्षित यांना २८ हून अधिक वर्षांचा अध्यापनाचा अनुभव आहे, ते लातूरच्या शासकीय वैद्यकीय महाविद्यालयात प्राध्यापक तसेच जनौषधी विभाग प्रमुख म्हणून कार्यरत आहेत. त्यांनी १९९० साली प्रतिबंधक व सामाजिक औषधशास्त्र या विषयात एम डी केले आहे व १९९१ मध्ये इस्पितळ व्यवस्थापन या विषयी पदव्युत्तर पदविका प्राप्त केली आहे तसेच १९९५ साली मानव संसाधन व्यवस्थापन या विषयावर पदव्युत्तर पदविका प्राप्त केली आहे.
त्यांच्या पुस्तके, वर्तमानपत्रे, रेडिओ, दूरचित्रवाणी या माध्यमातून स्वास्थ्य क्षेत्रात केलेल्या भरीव कामगिरीसाठी त्यांना तीन राष्ट्रीय तसेच चार राज्यस्तरीय पुरस्कारांनी गौरवलेले आहे!
त्यांना उत्कृष्ट शिक्षक (वैद्यकीय शिक्षण) तसेच २०१५-१६ साली महाराष्ट्र आयुर्विज्ञान विद्यापीठ, नाशिक यांच्या तर्फे डॉ शरदिनी डहाणूकर सर्वोत्कृष्ट शिक्षक या पुरस्काराने गौरविण्यात आले आहे.
- त्यांना द्वारीका संगमनेरकर फौंडेशन तर्फे शतायुषी पुरस्कार प्राप्त झाला आहे
- त्यांना इंडियन मेडिकल असोसिएशनच्या राज्यशाखेतर्फे डॉ सुरेश नाडकर्णी मित्रमंडळ पुरस्कारही प्राप्त झाला आहे!
- त्यांना इंडियन सोसायटी फॉर मलेरिया व अन्य सांसर्गिक रोग यांची फेलोशिप प्राप्त झाली आहे! त्यांना इंडियन असोसिएशन फॉर प्रेव्हेंटिव्ह अँड सोशल मेडिसिन यांची फेलोशिप प्राप्त झाली आहे! त्यांना इंडियन पब्लिक हेल्थ असोसिएशनची फेलोशिप प्राप्त आहे.
- त्यांनी “प्रिंसिपल्स अँड प्रॅक्टिस ऑफ बायोस्टॅटिक” व “प्रिंसिपल्स अँड प्रॅक्टिस ऑफ मेडिकल रिसर्च” ही लोकप्रिय पुस्तकें लिहिली आहेत जी भारतभरातील सर्व वैद्यकीय विद्यार्थी संदर्भ ग्रंथ म्हणून वापरतात!
- त्यांनी प्रथितयश मेडिकल जर्नल्स मध्ये ४० हुन अधिक शोध निबंध प्रसिद्ध केले आहेत.
- त्यांनी सर्व सामान्य लोकांसाठी स्वास्थ्य शिक्षण या विषयावर २० पुस्तके मराठीत लिहिली आहेत!
- ते प्रामाणिक व समर्पित शिक्षक आहेत. ते महाराष्ट्र आयुर्विज्ञान विद्यापीठ, नाशिक येथे पदव्युत्तर व पीएचडी साठी मान्यताप्राप्त मार्गदर्शक आहेत.
- ते स्वयंसेवी रक्तदान अभियानात कृतिशील आहेत, ५० पेक्षा जास्तवेळा स्वतः रक्तदान केले आहे
- डब्लू एच ओ, युनिसेफ तसेच इतर अनेक अशासकीय संस्थांसाठी सल्लागार म्हणून काम केले आहे.
- सध्या अतिलठ्ठपणा व मधुमेह प्रतिबंध या विषयावरील संशोधनात व्यग्र आहेत.
- त्यांचे “विनासायास वेटलॉस आणि मधुमेह प्रतिबंध” या विषयावरील पुस्तक अत्यंत लोकप्रिय आहे!
- स्व डॉ श्रीकांत जिचकार यांच्या कामावरून प्रेरणा घेऊन त्यांनी ” लठ्ठपणा व मधुमेहमुक्त विश्व” हे अभियान सुरू केले आहे. त्यांनी व त्यांच्या सहकाऱ्यांनी ‘विनासायास वेटलॉस व मधुमेह प्रतिबंध ‘ या विषयावर ३०० हुन अधिक व्याख्याने दिली आहेत. त्यांच्या समूहामध्ये ५६ समर्पित नेते आहेत त्यामध्ये बरेचसे डॉक्टर आहेत!
- त्याची या विषयावरील इंग्रजी, मराठी, हिंदीतील व्याख्याने युट्युब वर उपलब्ध आहेत, ती लाखों लोकांनी पाहिली आहेत!
- १५६ व्हाट्सअप्प ग्रुप, एक फेसबुक ग्रुपव एक फेसबुक च्या माध्यमातून ३६ देशातील 35 हजाराहून अधिक लोक या अभियानाशी थेट जोडले गेले आहेत!dr Jagannath Dixit
